اولا حركات السيارة

اذا فتحتي دبة السيارة سكريها باقوى مايمكن خلي كل السيارة تهز

افتحي درج السيارة ونبشي بالاغراض والرخص والوراق وانفليهم وخلي الدرج مفتوح .

لما تنزلي لاتنسي تظهري انوثتك بطريقتين .اولا افتحي الباب بقد مامعك على السيارة او الحيط اللي جنبك وثانيا سكري الباب بحيث اللي جوه السيارة يصيبه انهيار عصبي من قوة التسكير وفي حالة ماكانت عندك القدر الجسدية لتنفيذ الخطوة الثانية اتركي الباب مفتوح نص نص وروحي

اذا شفتيه غاسل السيارة مارسي ابداعك بوضع البصمات على القزاز والباب واذا عندك ولاد اعطي كل واحد كيس شبس وشكلاته وعلبة ميرندا حمرا.

لما تمري من جنب السيارة تاكدي انه ابزيم الشنته يمر على كامل سطح السيارة .

اذا معك علبة عصير حطيها على ظهر السيارة قبل ماتركبي ويفضل انك تنسيها

اذا ماكنتي تعرفي تسوقي تأكدي انه كل مره تطلعوا بالسيارة تطلبي يعلمك سواقه واذا قدرتي تقنعيه ماتخلي مطب الا واكلتيه على سرعه 60 على الاقل ولا رصيف الا وطلعتي عليه ومن فترة لاخرى اضربيها بسيارة ثانية او حيط

اذا كان معك رخصه خذي السيارة كل يوم مشوار ولما ترجعي صفيها بنص الشارع وانزلي.واياكي تعبيها بنزين لو ماكان فيها
اذا قطعتك اتركيها بنص الشارع وروحي بتكسي.




ثانيا السوق

اول مايرجع من الشغل بتكوني جاهزة وبتسحبيه عالسوق
بتمري على كل المحلات وبتشوفي كل الموديلات وبتجربي كل شي وبتفاصلي صاحب المحل ساعه زمن وبتطلعي بدون ماتشتري شي

اذا عجبك شي بتشتريه بدون مفاصله وبتخليه يكع السعر كامل واذا هو حب يفاصل بتحكيله لا ياروحي الاسعار ثابته بها المحل

بعد ماتنشفي ريقه بالسوق ويبطل في محلات فاتحه بتروحو
ثاني يوم اول مايرجع عالبيت بتحكيله يلا عالسوق بدي ارجع اللي اشتريته ما اجا علي ( يعني المابدك تشتريه جربتيه اما اللي بدك اياه ماجربتيه) وطبعا بمجرد ماتوصلو السوق بتعيدي الخطوة السابقة


ثالثا الدكتور

لما يرجع من الشغل وبمجرد ما يغير اواعيه بتحكيله (ليش غيرت بدي تاخدني عالدكتور)
ولما حبيب القلب يرجع يلبس وياخدك عالدكتور بتستني ساعة زمن وقبل مايجي دورك بشوي بتحكيله اففففففففففف طول الدور خلص انا صرتن منيحه يلا نروح

وبالليل بعد ماينام وتتاكدي انه غفي بتصحيه وبتحكيله خدني عالطوارئ رجعت تعبت (طبعا انتي زي القردة ومافيكي اشي)


رابعا الاكل

كل شوي بتحكي عليه عالشغل وبتسأليه شو حاب تاكل اليوم؟
ولما يجاوبك بتحكيله اوكي وبترجعي بعد ربع ساعه تحكيله ماعنا لوازم هاي الطبخه شو بتحب غيرها؟
وبتستمري على هالحالة لعند ميروح وبتحطي طبخة بايته من يومين ومابحبها واذا ماعندك اعمليله نودلز خليه يفيع (والله العزابية صارو يستحو يوكلو نودلز هالايام)

بتسأليه يوم شو اكثر طبخه بحبها واذا جاوبك بتتصلي عحماتك وتساليها كيف بتعملها هي وبعد ماتوخدي الوصفة استخدمي ابداعك بتشويه الطبخة .يعني قللي الملح او زوديه حطي بدل الكوسا خيار وبدل اللحمه سمك وحطيها عنار حامية منشان تنحرق من تحت وتضل نيه من فوق


خامسا اهله...

في المناسبات والاعياد بتخلي اهلك يجو عندك او تروحي انتي وياه عليهم وحاولي تطولي الزيارة قد ماتقدري منشان مايضل وقت لاهله

اذا اعطاكي شي وحكالك توديه لحماتك بتوديه بس بتحكيلها ما تحكي لجوزك لانه هاي منك وهو مابعرف عنها ومابحب المصاريف الزايده (وقعي بيناتهم بترتاحي)

اذا اجو يزوروه كل شوي طلعيله مشوار وماتخليه يقعد معهم .يعني احكيله يروح يجيب ضيافة الهم وكل مايرجع بتحكيله نسيت احكيلك تجيب معك كمان شغلة

طبعا مابخلص رواح وجيان بكونو صارو بدهم يروحو واذا سالو عنه بتحكيلهم انه هو هيك دايما طاش مع صحابه

سادسا الاواعي ( الملابس )...

اذا غسل اواعيه وكواهم بالمغسله بتاخديهم وبترميهم رمي باي محل منشان يتجعلكو او اغسلي بنفس اليوم وارميهم مع الغسيل

الصبح لما يجي يروح عالشغل خبيله كندرته كل فرده بجهه واذا سال احكيلو شو بعرفني هي كندرتي ولا كندرتك

اغسليله بياضاته مع الملون خلي كل قمصانه وغياراته زهر

بعد كل غسلة ضيعيله نص اواعيه وحطي كل فردة من جراباته مع فرده مش اختها خليه يدور عليهم ساعة زمن

اخيرا وليس اخرا النكد....

اذا شفتيه مبسوط نكسيه ونكدي عليه
اذا شفتيه منكد نكدي عليه بزياده وعيطي واحكي انه حياتك معه كلها نكد بنكد
بعد زيارات اهله وبالذات امه بس يروحو من هون بتبلشي امك حكت وامك قالت مع الاخذ بالاعتبار تحريف الكلام باكبر شلك ممكن وتغيير معناه بحيث انك تصوريله امه حية بسبع روس (اذا تم تنفيذ الجزء الخاص باهله بشكل سليم مارح يقدر يكتشف الحقيقة لانه كان بره يجيب اغراض)
اذا جابلك هديه باي مناسبه ماتنبسطي عليها بالعكس ازعلي واتهميه انه بعد كل هالسنين لسا مابفهم شو بدك
وخديلك شوط عياط ولمي اغراضك وعلى بيت اهلك





ملاحظة: كاتب المقال غير مسؤول عن اي حالات طلاق او زواج بأخرى او ضرب مبرح ناتج عن اتباع الخطوات الانفة الذكر__________________